Barn/ungdom som bur i utlandet

Er det noka organisert oppfølging frå dei norske styresmaktene si side av barn som bur i utlandet?

Dette gjeld alle grupper norske barn som av ulike grunnar oppheld seg i utlandet som følgje av at foreldra arbeider, bur eller har engasjement utanfor Noreg.

For barn av vaksne som jobbar på utanriksstasjonar i andre land
Dei departementa som har ansvar for utestasjoneringar, Utdanningsdepartementet (UD) og Forsvarsdepartementet (FD), opplyser begge at dei har rutinar for å ta hand om tilsette og familiane deira både før, under og etter utanlandsopphaldet.

Skole/språk/undervisning
Departementa blei på bakgrunn av ei undersøking einige om at det først og fremst er på områda skole/språk/undervisning at barna kan få til dels store problem i utlandet, og at barn med spesielle behov – fysisk, psykisk og sosialt – er i ein særleg utsett posisjon. Dette samsvarer med opplysningane frå IBAN (Interesseorganisasjon for barn av nordmenn busette i utlandet).

Leggje opp best mogleg undervisning
Kunnskapsdepartementet(KD) er ansvarleg for å godkjenne, gi tilskot til og ha tilsyn med dei private skolane i utlandet. UFD ved Fylkesmannen i Oslo og Akershus har ei pedagogisk-psykologisk teneste for skolar i utlandet. Denne tenesta skal hjelpe til med å vurdere om elevar har behov for spesialundervisning, og hjelpe skolane i arbeidet med å leggje opplæringa til rette for elevar med særskilde behov. Dersom det er nødvendig å styrkje tilbodet til utsette barn, gjer ein dette i samarbeid med skolane heller enn å byggje ut eit nytt hjelpeapparat.

Kvar skal ein ta kontakt om det ikkje går så bra?
Fornyelsesdepartementet (BLD) har utarbeida ei handbok som tek for seg kvar barn og vaksne kan vende seg dersom det oppstår problem. Denne oppskriftsboka sendast ut til skolar der det går norske elevar, til norske utanriksstasjonar, til sjømannskyrkjer og til turoperatørar som sel langtidsopphald. Dermed vil boka også kunne nå dei barna som ikkje har tilknyting til norske utanlandsskolar.

Les handboka (pdf).

Barnevern i andre land
Det høvet barnevernet har til å hjelpe barn som bur i andre land, er avgrensa fordi norsk barnevernlovgiving berre gjeld så lenge barnet oppheld seg i Noreg.

Dersom barneverntenesta kjenner til familien før utreise, kan kommunen sende ei bekymringsmelding til barnevernet i vertslandet med oppmoding om å følgje opp familien. Det vil likevel vere opp til barnevernstyresmaktene i det landet ein er i, om og eventuelt på kva måte saka skal følgjast opp.


Kjelde: Barne-, likestillings- og inkluderingsdepartementet