Eg vil gjerne bli ung motivator men har sosial angst

Hei

Så flott at du har lyst til å prøva deg, sjølv om du har sosial angst! Blir òg veldig glad av å høyra at du trur du skal få det til. Eg skal gi deg nokre tips som du kan bruka, og håper at dei hjelper deg til å nå målet

For å bli tryggare på å snakka føre andre menneske, er det viktig å øva seg på det. Du kan til dømes finna noko du skal presentera for menneske. Så øver du deg! Hald foredraget føre hunden din eller kosebamsen din? Føre foreldre og søsken? Eller snakk med læraren og få lov til å øva deg i ei lita gruppe du er trygg på?

Det er heilt normalt å bli nervøs, og det å vera litt nervøs gjer at du blir litt meir skjerpt. Nokon gonger blir ein så nervøs at det går ut over framføringa, men det går mykje lettare viss du har øvd litt slik som eg skriv over. 

Viss du kjenner at kroppen ikkje lenger gjer heilt som du ønsker, ta ein liten «time-out». Fortel gjerne at du er litt nervøs. Dette er ikkje noko nederlag, og det er garantert mange i klassen som kjenner seg godt igjen!

Veldig lurt òg å ha med ein som du er trygg på,  slik at du i starten ikkje står der åleine, men har støtte!

Psykisk helsearbeider, ung.no