Kan ambulanse og politi bruke tvang?

Hei,

Fint at du kontaktar oss med spørsmålet ditt.

Helsevesenet ber nokre gonger om hjelp frå politiet. Dette skjer berre når helsevesenet treng å vurdere om pasienten skal behandlast med tvang, eller det er ein pasient som er i tvangsbehandling. Vilkåra for å behandle ein pasient med tvang er strenge. Det er helsevesenet som gjer denne vurderinga og ikkje politiet.

Viss helsevesenet ber om hjelp frå politiet, så er det politiet i den einskilde situasjonen som må vurdere korleis dei kan hjelpe på best mogleg måte. Politiet skal alltid bruke så lite makt som mogleg og på ein så skånsam måte som mogleg. Det skal som hovudregel i slike situasjonar alltid vere eit helsepersonell til stades saman med politiet.

Eg legg ved ein link til den regelen i lov om psykisk helsevern, som seier noko om når helsevesenet kan be om hjelp frå politiet: psykisk helsevernloven § 3-6 andre ledd.

Kanskje du kan snakke med dine føresette eller nokon andre som du stolar på, om episoden der du vart frakta mot vilja di. Det kan kanskje vere til hjelp for deg. Du kan og kontakte ambulansetenesta og snakke med dei no i etterkant, viss du ønskjer det.

Eg håper dette var nyttig for deg.

Pasient- og brukerombudet

www.pobo.no