Kvifor vert eg ikkje så kåt lengre?

Hei!

Det er ikkje uvanleg at lysten på sex endrer seg gjennom livet. Sjølv om det er slik, kan ein bli stressa og uroleg når det skjer. Ein kan bli spesielt uroleg om det skjer rett etter puberteten. I puberteten vert ein van med at ereksjonane kjem akkurat når ein ynskjer det og at ein kan kjenne på lyst stort sett alltid.

Dei aller fleste kan oppleve at ereksjonen ikkje er heilt slik ein skulle ynskje. Når ein opplever dette dei første gongene tenkjer ein ikkje så mykje på det. Gjentek det seg, kan ein etterkvart verte uroleg for om det er slik det skal bli framover. Etter å ha opplevd ereksjonssvikt nokre gonger kan det etablere seg eit mønster der ein forventer det skal skje, og så skjer det.

Stress er ei vanleg årsak til at lysta på sex endrer seg og det å bli student er for mange ei stressande oppleving. Det kan og vere andre ting som gjer at ein kjenner på stress, uro og bekymring som ein ikkje har oversikt over. Då vert det vanskeleg å finne ut av kva årsaken kan være.

Problemet ditt er altså ganske vanleg, men det er vanskeleg å kome med ei sikker forklaring her på ung.no sidan vi ikkje får snakka saman. Eg vil difor tilrå deg å snakke med nokon. Helsestasjon for ungdom er ein bra stad å få hjelp. Nokre studiestader har helsetilbod. Har din studiestad det, kan det vere fint å sjekke det ut.

Håper svaret var til hjelp for deg!

Hilsen Sexologisk rådgiver - NACS