Vi slo opp. Eg er så lei av å ha det vondt.

Hei!

Så utruleg leit å høyre at du og kjærasten din har slått opp, og at han attpåtil har gått så raskt vidare.

Eg forstår skikkelig godt at det er veldig vondt at han allereie har byrja å prate med ei anna jente, når han sa at han trengte tid for seg sjølv. Å stå igjen etter eit brudd der du eigentleg tenkjer at dokker kunne hatt det bra saman, er vondt.

Ein blir lei av å ha det så mykje vondt! Det er jo noko du dessverre er nødt til å stå i akkurat no, men heldigvis er det mykje som kan hjelpe å gjere det betre. Den største trøsten kan vere at dette faktisk vil bli betre av seg sjølv. Kanskje du merkar at kvar dag blir bittelitt betre enn den forrige?

Å få satt ord på kjenslene du har, er viktig. Da er det kjempebra at du har skrive inn til oss! Å snakke med nokon du stoler på, vil både gjere at du får utløp for tankar og kjensler, men også gjere at du slepp å bere byrden åleine.

Kanskje det også kan hjelpe å tillate deg sjølv å vere litt sint? Det er viktig å få utløp for alle kjenslene, og å vere litt sint etter at du føler du har blitt urettferdig behandla, kan vere godt (om det er noko du kjenner på, selvfølgelig). Alle kjenslene du har no er OK å kjenne på, og uansett kva du kjenner, så er det fint! Å høyre på musikk kan også vere ein trøst og et rom for utløp, og en måte å ikkje kjenne deg åleine i kjenslene på.

Om det er noko usagt mellom dokker, kan det hende det kan vere lurt å få snakka med han, så det blir lettare for deg å gje slipp.

Å vere i fysisk aktivitet, kome deg ut i frisk luft, og spise og sove godt, er det aller viktigaste du kan gjere for deg sjølv. I tillegg kan det vere godt å vere med folk du er glad i, og bruke litt tid på noko som er viktig for deg, så du får ein pause fra kjenslene i blant. Kanskje du kan prøve noko nytt, som du har hatt lyst til å prøve? Det er for eksempel vanskelig å vere for oppteken av kjærleikssorg om du er høyt i ein klatrevegg;)

Det kan også hjelpe å hugse på at om det er meint å bli dokker to, så vil det bli dokker to til slutt. Men anten det blir dokker to eller ikkje, så kjem du til å klare deg, og du kjem til å ha det bra igjen<3

Held ut, dette kjem til å bli betre!<3

Hilsen ungdomsredaksjonen, ung.no