Korleis kan eg bli betre kjent med ein som er eldre?

Hei!

Eg skjønar godt at dette er frustrerande. Du likar han godt og tenker mykje på han, men det verkar som om han nesten ikkje ensar deg. Sjølv om han ikkje er så mykje eldre enn deg trur eg likevel at han kanskje er såppas mykje eldre at han ikkje ser på deg på den måten. I ulike aldrar har ein gjerne forskjellige interesser og ting ein er opptekne av. Han skal tenke på vidaregåande og livet framover, medan du har ei god stund att på ungdomsskulen. De har sannsynlegvis også veldig forskjellige vennegjengar og fritidsaktivitetar også. Det betyr sjølvsagt ikkje at det ikkje kan gå, men det gjer nok at det er meir komplisert og at ein må inngå kompromiss dersom ein er i eit forhold. Det kan hende det er derfor det er vanskeleg å få kontakt med han og at han ikkje legg deg til. 

Det er ikkje ein fasit, så du kan jo sjølvsagt prøve. Eg forstår at du får panikk når du ser dei, men på den måten kjem du aldri til å bli kjend med han. Utfordre deg sjøv! Kanskje du kan starte med noko så lite som å spørje om han har sett ein lærar du leitar etter? Eller om han veit kor kopimaskina er? Der har du ein god måte å sjå korleis han reagerer når du snakkar til han. Kanskje du kan begynne å sei hei og smile til han i gangane? Ta det gradvis, og etterkvart får du kanskje moglegheita til å vere aleine med han slik at du kan snakke om kjenslene dine. 

Lykke til!

Hilsen ungdomsredaksjonen, ung.no