Kan eg bli brannmann sjølv om skulderen har gått ut av ledd?

Hei!

Det er forståeleg at du blir usikker når skuldra har gått ut av ledd to gongar, særleg når du har eit så tydeleg mål om å bli brannkonstabel. Samtidig seier det også noko viktig at du allereie har hatt veldig god styrke og treningserfaring.

Det finst ikkje eitt enkelt svar på om du kan bli brannmann eller ikkje. Det vil ofte handle om korleis skuldra fungerer over tid, kor stabil ho er etter opptrening eller eventuell behandling, og om du klarer dei fysiske krava i praksis. At du ikkje kom inn i Forsvaret betyr derfor ikkje automatisk at døra er stengd for brannyrket. Forsvaret og brannvesenet kan ha ulike vurderingar og krav.

Brannyrket stiller høge krav til:

• stabilitet i skuldrer og kropp
• tungt fysisk arbeid
• arbeid i krevjande situasjonar og stillingar

Derfor vil det vere viktig at du følgjer opp skuldra godt vidare, gjerne med fysioterapeut eller lege som kjenner til målet ditt. Mange opplever at dei kan kome tilbake til høg funksjon etter skulderskadar, men det varierer frå person til person.

Det kan også vere lurt å undersøkje dei konkrete opptakskrava hos brann- og redningsskular eller lokale brannvesen tidleg. Då får du meir konkret informasjon om kva som faktisk blir vurdert.

Det verkar som du er motivert og villig til å jobbe for dette målet, og det tel mykje. Karriereval handlar heller ikkje alltid om enten eller. Sjølv om vegen kanskje blir litt annleis enn du først såg for deg, finst det ofte fleire moglegheiter innan redning, beredskap og fysisk aktive yrke.

Med vennlig hilsen

Karriereveiledning.no i samarbeid med ung.no

Vi har valgt ut dette for deg

Sånn kan fastlegen hjelpe deg