Korleis kan eg velje kva gutt eg vil vere med?

Hei! Eg forstår godt at dette er forvirrande og det er vanskeleg å velje kva gutt du vil vere med. Du har småflørta med begge to og trur kanskje at dei begge likar deg også.

Det er ingen fasit på kven du burde vere med. Det er lurt å velje ein av dei, slik at du viser at du også er interessert, men du treng ikkje å velje heilt enda. Det er heilt greit å sjå an litt steminga med begge og finne ut kven du likar best.

Akkurat no har du jo meir kontakt med ein av dei, og du kan finne ut om det er noko meir der. Kanskje de kan finne på noko saman, og så kan du kjenne på korleis kjemien er mellom dykk og om du vil vere meir saman med han. Om du derimot kjenner at du heller skulle ha vore ein annan stad når du er saman med han, er det eit teikn på at du kanskje ikkje er så interessert.

Han andre har du flørta litt med, og du kan jo prøve å prate meir med han for å sjå korleis kjemien er mellom dykk to. Får du lyst til å prate meir saman med han eller vere nær han?

Kjenn litt ekstra på eigne kjensler når du er i nærleiken av dei. Når du er aleine, kven av dei vil du helst prate med eller vere saman med? Det gir deg ein peikepinn på kven du burde velje.

Hilsen Ungdomsredaksjonen, ung.no