Lurer på om eg har BDD/kroppsdysmorfofobi

Hei du

Så fint at du tar kontakt når du har det vanskeleg.

Dersom du ønsker ei utredning for BDD og eventuelle andre problem så må dette gjerast hos BUP. For å få kontakt med BUP treng du henvisning frå fastlegen din først. Du er 16 år og kan gå aleine til fastlege dersom du ønsker det - du kan også ha med foreldre for hjelp og støtte. Eit anna alternativ er å kontakte helsesjukepleiar på skulen din i første omgang for å få råd og hjelp til kva vedkommande tenker det blir lurt for deg å gjere framover.

BDD er ein ganske inngripande lidelse der ein vil ha eit forvrengt bilete av eige utsjånad og der ein gjerne vil vere overbevist om at det er noko gale/defekt meg eigen utsjånad. Det vil vere overdrivent og der andre ikkje vil sjå det samme. Det vil skille seg ut frå det som betre kan beskrivast som dårleg sjølvfølelse og sjølvtillit ettersom det vil vere meir alvorleg og meir gjennomgripande/så godt som alltid vere til stades. Det høyres ut som at det svingar litt meir for deg - at det går opp og ned og at korleis du tenker og føler om eigen utsjånad gjerne påvirkast av korleis du har det i følelseslivet ditt den dagen. Kanskje er du veldig var på korleis andre er og oppfører seg rundt deg og at du føler deg dårlig og bra utifrå deira vurderingar og tilbakemeldingar på deg.

Det vil ikkje vere så lett å seie noko over nettet når grensa går frå veldig dårlig sjølvfølelse/sjølvtillit og over til meir alvorlige vanskar om BDD. Som sagt vil du trenge å snakke med nokon direkte om dette og du har fått tips om dette over. Så ta kontakt med nokon du kan drøfte med direkte om dei problema du har.

Ønsker deg alt godt og masse lykke til vidare!

Med beste helsing psykologen