Eg lengtar heim og likar ikkje lærlingplassen, kva gjer eg?

Hei!

Takk for at du skriv inn til oss.

Eg forstår at dette ikkje er noen god situasjon for deg. Det er sjølvsagt ikkje godt å kjenne at du både lengtar heim og at du mistrivast som lærling. Samstundes veit eg at du kan få det betre og at det er løysingar.

• Eg vil råde deg til å ta kontakt med skulen og kontaktpersonen som skal vere rettleiaren din inn i praksis. Her skal du kunne ta opp slike saker som du skriv om. Det nyttar å fortelje om dette fordi du kan bli forstått og staden du er lærling på kan få beskjed om korleis du opplev dagane.
• Det kan også vere nyttig å snakke med leiaren av staden du er lærling på. Fortel om dine opplevingar. Ein lærlingplass skal også kunne tilrettelegge og hjelpe deg til å meistre faget.
• Når det gjeld heimlengsla di kan det vere ok å snakke med dei heime om dette. Fortel korleis du har det og snakk saman på telefon. Det gjer at du kan kjenne deg mindre åleine.
• Når du lengtar heim kan det også hjelpe å gjere noe aktivt. Kanskje kan du ta deg ein tur ut, besøke ein stad du ikkje har vore eller ta initiativ til å vere saman med noen andre. Det kan gje deg små pauser frå heimlengsla.
• Hugs at det også er heil normalt å lengte heim. Det er mange som kan kjenne seg igjen i det du skriv. Kjensla av å lengte heim kan vere vond. Samstundes kan denne kjensla bli svakare etterkvart som du blir betre kjent på den nye staden.

Lykke til!

Hilsen helsesykepleier, ung.no